भेरी-कर्णाली र भोटे-लामा गणराज्य घोषणाको तयारीमा माओवादी

काठमाण्डौ, ३० मंसिर- ६ वटा गणराज्य घोषणा गरिसकेको एकिकृत माओवादीले आज पनि थप दुई गणराज्य घोषणा गर्दै छ ।

आज उसले हुम्लाको सिमिकोटमा भेरी-कर्णाली र जुम्लामा भोटे-लामा गणराज्य घोषणा गर्दै छ । हुम्लामा भेरी-कर्णाली गणराज्य घोषणा विदेश विभाग प्रमुख कृष्ण बहादुर महराले गर्नुको साथै भोटे-लामाको माओवादी स्थायी समिति सदस्य नेत्रविक्रम चन्द विप्लबले गर्ने माओवादीले जनाएको छ । यसका साथै माओवादीले गणराज्य घोषणाको तयारी स्वरूप हुम्ला र जुम्लामा ठूलो संख्यामा मानव सागर उतारिरहेको बुझिएको छ । विभिन्न क्षेत्रबाट माओवादी गणराज्य घोषणाको कार्याक्रम शान्ति प्रक्रिया विपरित भएको भनी खण्डन भइरहेको अवस्थामा माओवादीले २२ बुदे शान्ति सम्झौता एव अन्तरिम संविधानको भावना अनुरूप राजनीतिक रूपमा मात्र गणराज्य घोषणा गरिएको बताउदै आएको छ ।

यस्तै उसले कोचिला, लिम्बुवान, सेती-महाकाली, थरूहट र हिजो शेर्पा र किरात गणराज्य घोषणा गरिसकेको छ ।